كتاب حياتي يا عين

السلام عليكم يا جدعان
انا بس جيت احجز مكان في المدونات
عشان يمكن يغلوا ولا حاجة
وهاصلي الظهر واجي اقوللكم المفيد ان شاء الله
يلا السلام عليكم
اية رايكم ضيفة خفيفة
باهزر طبعا مش عاوزة رايكم في مدونتي
ما تنسوش انا المديرة يعني اقدر اطردكم طرد من هنا
بس الطيب احسن احنا في رمضان
هاصلي الظهر واجي لكم طيران
يلا سلام

اانا جييييييييييت متاخر بس اهوه جيت والسلام
حكايتي يا ناس صلوا علي النبي الاول (عليه الصلاه والسلام)
اصلي هاطول عليكم
انا في الاول كنا عايشين في اوضة فيها ست اخوات وامهم وابوهم وبعدين نقلنا في شقة كبية نوعا ما بالنسبة للاول وعيشنا فيها فترة ورجعنا تاني للمنطقة الاولي اللي كنا ساكنين فيها واخدنا شقة بعد ما اخويا اتجوز عشان كدة الدنيا اتظبطت حبة حبة .......المهم
جينا هنا وسكننا في شارع مش بطال يعني وقاعدين فيه لحد دلوقتي ماشي الكلام ماااااااشي
انا بقي بعد ما خلصت المدرسة روحت طيران علي الجامعة اللي بعد بيتنا بحاجات بسيطة
واختياري للجامعة جيه غصب عني عشان صحبتي الانتيخ هي اللي قررت انها تدخل كلية التجارة وانا عشان ما ازعلهاش دخلت معاها شوفتوا العبط
بس ولله بعد ما دخلتها حبيتها اوي وفرحت بنصيبي
اصلي ما كانش عندي اي طموح في اني اكون اي حاجة تانية يعني عشان ارفض اكون محاسبة .......المهم بردو
دخلت الجامعة وعيشت احلي ايامي مع اني كنت محجبة حجاب جامد يعني بس دة ما نعنيش اني اعيش حياتي عادي يعني الحجاب مش موت
وكنت باخرج مع اصحابي وباروح وباجي براحتي لان اخواتي وامي عندهم ثقة جامدة اوي فيا
وانا كنت قد الثقة دية مع ان اصحابي كانوا عمرهم ما بيقولوا لاهلهم هما رايحين فين ولا جايين منين
الا انا لازم التقرير اليومي يبقي ممضي من امي واخواتي البنات الكبار عشان ان مش باعمل اي شيء غلط
المهم بردو ههههههههه
خلصت الجامعة واتجوزت سيد يا سيد وعيشت في بيت امه لحد ما ربنا يسهل لنا ببيت تاني(بقي لي اربع سنين هنا يعني لسة ربنا ما سهلش دعواتكم ليا )
وجبت اروة بنتي حبيبتي اللي مريحاني علي الاخر الله يهديها ويصلح حالها وحال المسلمين
وبعد ما اروة بقي عندها سنتين وبطلت رضاعة كانت بتسيبني طول اليوم وبتقعد مع عمتها
حبيت استغل الفرصة واخرج اشتغل
في البداية كنت خايفة لحسن الاقي معارضة من اصحاب الشغل انهم يشغلوا وحدة منقبة
بس في الحقيقة كل وظيفة اروح اتقدم فيها مش بالاقي اي مشكلة من النقاب ابدا
يتبع .....
هههههههههههه كان نفسي اكتب كدة والله بس يلا ربنا حقق لي الامنية
يتبع .......

هاييييييييييييي عليكم انا جيت
تكلمة الحلقة اللي فاتت
قدمت في شغلانه في رمضان بس ما حبيتهاش خااالص وفضلت فيها...........3 ايام بس هههههههه
اصلي لما اكره مكان باكره الناس اللي فيه كمان
بس يلا مش مشكلة الهم قعدت في البيت لحد ما رمضان قرب يخلص لقيت اعلان بيناديني والله العظيم
روحت اتصلت وعملت مقابلة قبل الوقفة بتاعة العيد بيومين وقبلوني وبالعكس دول رحبوا بوجودي كمان لاني كنت واخدة تدريب طلبة وخريجين في البنك الاهلي المصري ودة خلاهم وافقوا عليا اكتر
المهم اشتغلت معاهم ومرتبهم عجبني جدا كان احليمن الشغلانة الاولانية
وحبيت المكان هناك اوي اوي وبقيت استني فرصة اني اروح الشغل بفارغ الصبر طبعا عشان الشغل نفسه حلو والحلي من كدة اللمة الحلوة
طبعا هتساولين الليمة الحلوة اللي هي لمة مين؟
هاقوللكم هي لمة صحابي الحلوين فتافيت الملح وفتافيت السكر وويست ويند وروزة وام بلال وام ميكي(الله يعرفها طريقنا بالسلامة الست دية واحشاني اوي ومش عارفة اشوفها)
وطبعا الخماسي المرح دة اتعرفت عليه عن طريق منتدي تاني كلنا عارفينة لانه كلنا جايين من عندة
وكنت دايما بحب اتناقر معاهم وباتجنن لما حد فيهم بيغيب
يتبع........